Euskal Herriko Helduen Bertso Eskolen Batzordeak Bertsotruk egitasmoa ipini du abian, helduen bertso eskolen arteko harremanak sustatzeko asmoz. Bertan 26 bertso-eskolek eman dute izena eta haien artean Mungia eta Larrabetzuko lagunek osatutakoa dago.
Bertso-eskola horien artean multzoak osatu dira, guztira 9 multzo. Bertso-eskola bakoitzak bere multzoko beste biak hartuko ditu etxean, eta beste bi herrietako bertso-eskolek antolatutako ekitaldietara joango da. Emanaldia edozein motatakoa izan daiteke: bertso-saio formala, bertso-bazkaria, bertso-antzerkia, bertso-jolasen bat... Mungia/Larrabetzukoak Oñati eta Sakanako eskolakoen lagunekin daude multzo berean. Bertsotruk egitasmoa azarotik maiatzaren bitartean izango da.