Ekimenak 15 eta 95 urte arteko herritarrei lagunekin edo familiarekin jan, jolastu edo ondo pasatzeko berdegune bat eskaintzea du helburu. Gym berdeak, lorezaintza aktibitate nagusitzat duen kanpoko gimnasioak, gune berria prestatu eta kudeatuko du.
“Gune pilotua da. Oporretatik bueltan larrabetzuar askok esan ziguten horrelako landa bat botatzen zutela faltan eta horregatik eraman dugu aurrera proiektua. Guk zainduko dugu berdegunea eta belarra moztuko dugu, erosoa eta garbia izateko. Beraz, piknik frantzesa proposatzen diogu jendeari, hau da, bakoitzak manta bat eta janaria saski batean eraman ditzala”, esan du Keko Alonso Gym berdearen promotoreak.
Adituen arabera, piknik egitea oso onuragarria da, familian lurrarekin kontaktu zuzenean egotean, endorfinak (plazerraren hormona) askatzen direlako, familiartekoen harremanak hobetzen direlako, eta bai bakarkako, bai proiektu eta amets kolektiboak sortzea sustatzen direlako. Eta horrek guztiak norberaren osasunean eta komunitateko bizitzan dauka eragin zuzena. Larrabetzuar guztiei egin diete herrian bertan piknik egiteko gonbitea.