Joan den urteko otsailean egindako herri batzarrean adierazi zuten moduan, badago Larrabetzuko gaur egungo egoera aztertzeko beharra, eta horretarako, hamar atal landuko dituzte, teknikari batek lagunduta: kulturgintza, euskara, ingurumena, ekonomia, hondakinak, gazteak, kirola, memoria historikoa, etxebizitza eta eskola. Gai horien inguruan lanean dabiltzan herriko eragileei deialdia luzatu, eta lan-talde bat osatu da dagoeneko. Adostutako gidoi bat oinarritzat hartuta, egoeraren azterketa ere egin da.
Urtarriletik ekainera bitartean sei gai landuko dituzte: ekonomia, ingurumena, hondakinak, euskara, kulturgintza eta etxebizitza. Beste gaiak, kirola, memoria historikoa, eskola eta gazteak, hurrengo ikasturtean landuko dituzte.
Herritarrek aukera bi edukiko dituzte proiektuari euren ekarpena egiteko: alde batetik, urtarrilaren 29tik otsailaren 2ra, eta martxoaren 5etik 23ra antolatuko diren topaketen bidez; eta bestetik, parte-hartze birtualaren bidez. Orotara, hiru interakzio birtual egongo dira: lehenengoa, urtarrilaren 21etik 28ra; bigarrena, otsailaren 19tik martxoaren 4ra; eta hirugarrena, martxoaren 26tik apirilaren 15era. Ekarpenak www.Larrabetzu2025.eus webgunearen bidez egin ahalko dituzte, baita Udalak emango dituen beste aukera batzuen bitartez ere, hala nola Hirix aplikazioa eta WhatsApp.
Prozesuari maiatzean/ekainean emango diote amaiera, eta emaitzak aurkeztuko dituzte jendaurrean.