Eguerdian, 12: 30ean, Iñaki Suarez eta Elena Urigüen sommelierrek brindisa egin zuten, baita dastaketa txiki bat ere. Adituek esan zuten bezala, ekoizpena iaz baino txikiagoa izan da aurten, baina ardoaren kalitatea, aparta. Guztira, 610 kopa saldu ziren. Udalak iragarri zuen kopa bakoitzeko euro bat emango ziola Garmitxa elkarteari; beraz, 610 euro jaso zituzten Garmitxakoek.
Azokak ortuko produktuak eta, noski, txakolina bultzatzea du helburu. Guztira, zazpi txakolin-egile batu ziren Larrabetzun: lau lezamar –Magalarte, Basalbeiti, Erdikoetxe eta Garkalde– eta hiru larrabetzuar –Gorka Izagirre, Sasine eta Bitxia–. Gainera, Gurpide elkarteak postu batzuk jarri zituen, bertoko produktuak saltzeko: ogia, barazkiak, gazta... “Arratsaldean, disc-jockey bat aritu zen Hori Bai gaztetxean eta horri esker, giro polita egon zen herrian goizean ez ezik arratsaldean ere”, esan digu Iñigo Gaztelu alkateak.
