Zapatuan, maiatzak 4, Bizkargira igoera egingo dute zortzigarren aldiz Larrabetzun. Lasterketa goizeko 12etan hasiko da. Bestalde, domekan, maiatzak 5, hainbat ekitaldi egongo dira mendi tontorrean. Amorebieta.com webgunean jakinarazi duten moduan, goizeko 11etatik aurrera trikitilariek eta txistulariek girotuko dute goiza, eta 12:30ean “Iragana, oraina eta geroa” ekitaldia egingo da. Ondoren, zanpantzarrak izango dira, Larrabetzuko Bizkargi dantza taldearen emanaldia, eta aginte-makila emango diote Etxanoko Nagusiari. Era berean, bertsolariak arituko dira –Xabier Arriaga Txiplas, Onintza Enbeita, Etxahun Lekue eta Malen Amenabar– , eta kantaldia egongo da Eneko eta Markelen eskutik. Dimako Kantu Bat Gara taldeak kontzertua eskainiko du 13:15ean. Ekitaldiak Bizkargi Gogoratuz elkarteak antolatu ditu.
Larrabetzuk lekukoa hartuko du arratsaldean. Arrastiko 7etan ekitaldia egingo da, eta ostean erromeria izango da plazan Imuntzo eta Beloki taldearekin.