Jose Migel Etxeandia larrabetzuarraren gorpua topatu dute gaur, 13:00etan, Itxinan, Gorbeia mendiko alde bizkaitarrean. Ertzaintzak esan die senideei istripuzko heriotza izan dela, Jose Migel amildegitik erori omen zela. Azken egunotan, hainbat lagun ibili dira Etxeandiaren bila: Ertzaintza, Gurutze Gorria, DYA, txakurrak, helikoptero bat, lagunak, senideak… Gaur, 20:00etan, bilera bat egingo da Larrabetzuko plazan.
Etxeandiak 59 urte zituen eta domeka arratsaldeko lehenengo orduan, irailak 29, ikusi zuten azkeneko aldiz Arrabako inguruan, Gorbeia mendian. Antza denez, Etxeandia lagun batzuekin joan zen domekan mendira. Lagunengandik banatu zen, eta etxera bere kabuz itzuliko zela esan zien.
“Ezbehar handia izan da, eta horren aurrean Larrabetzu herriak zelan erantzun duen aipatu nahiko nuke. Guztira, 60 lagun ibili dira Jose Migelen bila, eta horietako batek, hain zuzen ere, gorpua topatu du. Gainera, bart bilera bat egin dugu plazan eta 200 lagun batu dira bertan. Txalogarria izan da herriko jarrera”, esan du Iñigo Gaztelu alkateak.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
