Ebaluazioak 65 urte baino gehiago dituzten lagunei egingo zaizkie eta doakoak izango dira. Programan parte hartzeko, 945 560 111 telefonora deitu behar da, edo e-maila contacto@ubikare.io helbidera bidali. Guztira, 30 azterketa egingo dira. “Larrabetzun bizi diren biztanleen % 18 65 urtetik gorako pertsonak dira. Horregatik, pertsona guztien beharrizanak ezagutzeko beharrezkoa da interbentzio zabalago bat egitea. Horrela, pertsonen bizi-kalitatea hobetu nahi dugu, osasunez betetako bizitzako urteak luzatuz eta menpekotasuneko urteak murriztuz”, adierazi du udalak zabaldutako oharrak.
Programa fase batzuetan egingo da. Lehenengoz, elkarrizketa pertsonalak egingo dira, bakoitzak bizi duen errealitate konkretua ezagutzeko. Bigarrenez, osasun zentroko pertsonek, udaleko gizarte-langileek eta Ubikare enpresak (balorazioak egingo dituenak) balorazioaren emaitzak aztertuko dituzte. Hirugarrenez, ekintza plana proposatuko dute, parte-hartzaileen autonomia hobetzeko asmoz. Eta azkenik, txosten pertsonal bat emango zaie parte-hartzaileei.