Hitzarmenean jaso denez, udalak Errebale jauregian atondutako aterpea ipiniko du elkartearen eskura, eta horrek instalazioak zaintzea eta erromesak artatzea izango ditu ardura. Aterpean, egunero 22 lagun hartzeko lekua dago, baina beste 10 leku gehiago eskaini daitezke. Bestalde, elkarteak 500 euro emango dio udalari uraren eta argiaren urteko gastuak ordaintzeko, eta aterpea mantentzeko beharrezkoak diren gastuak ere ordainduko ditu, hala nola garbiketa, botikina eta tresneria. Iaz 3.500 lagunek baino gehiagok lo egin zuten Larrabetzuko aterpean.