Iñigo Gaztelu Larrabetzuko alkatearen esanetan, udalak sexu-jazarpenaren berri izan bezain laster eraso sexisten kontrako protokoloa ipini zuen martxan eta, halaber, babesa adierazi zien neskari eta bere familiari. Bestalde, adierazpen instituzionala egin du herrian gertatutako eraso matxista gaitzesteko. “Ezin dugu onartu, inondik inora ere, gure herrian horrelako erasoak gertatzea”. Bestalde, eta aipatutako protokoloari jarraituta, udalak baliabide psikologikoak, juridikoak eta ekonomikoak ipini ditu neskaren eskura, halakorik behar izanez gero.
“Larrabetzuko Udalak, indarkeria matxista publikoki eta gogor salatzeaz gain, emakumeen kontrako indarkeria matxista behin betiko bukatzeko duen konpromiso sendoa berresten du. Emakumeek emakume izateagatik jasaten duten indarkeria estrukturala da, eta guztion ardura da horrekin amaitzea. Halandaze, Larrabetzuko Udalak ozen adierazten du, batetik, pertsona guztiok dauzkagula eskubide berberak, eta, bestetik, hori hala izan dadin bere esku dagoen guztia egiteko konpromisoa hartzen duela. Larrabetzuko Udalak errespetu eta tratu oneko elkarbizitza sustatzeko eta emakumeen kontrako edozein indarkeria ekiditeko lan egiten du”, adierazi dute dokumentuan.
Twitter gizarte-sarean irakurri dugunez, Zutunik herriko elkarte feministak ere elkartasuna adierazi dio neskari, eta erasotzaileari aurrean izango dituela ohartarazi dio.