Frantziako Konstituzio Kontseiluak hizkuntza gutxituen aldeko legea atzera bota du partzialki, 4. eta 9. artikuluak Frantziako Konstituzioaren aurkakoak direla argudiatuta. Mobilizazioaren antolatzaileen esanetan, “ebazpenak hizkuntza gutxituen murgiltze-ereduaren aurka egiten du. Horrek, besteak beste, ikastolak ataka larrian eta etorkizun ziurgabean ipintzen ditu”. Darabilgu elkartekoek laster jakinaraziko dute data berria.
Laburbira euskarazko film laburren zirkuitua da eta Topaguneak antolatzen du herrietako elkarteen laguntzarekin. Azken saioa Larrabetzun egitekoa zen zapatuan, maiatzak 29, baina hura bertan behera gelditu da, Darabilgu elkarteak bat egin duelako Ipar Euskal Herriko hautetsiek eta euskalgintzako eragileek egun horretarako Baionan deitutako mobilizazioarekin.