Atzoko partidan Gadakaori 1-2 irabazi ostean, Uritarra Larrabetzuko futbol taldea hirugarren mailara igo da. Talde xumea da eta hura osatzen duten guztien artean erakutsi dute gauzak beste modu batean egin daitezkeela. Iban Garcia Uritarra taldearen presidenteak adierazi duenez, “garaipen atzean ez dago bakarrik aurtengo lana, aurreko urteetan ere egindako lan itzela baizik. Taldearen inguruan dagoen sentimendua ere ezinbestekoa da, eta batasuna. Horiek guztiek benetako taldea izatea egiten dute”.
Garcia oso pozik azaldu da taldearen igoerarekin eta azpimarratu du herritar guztiek, eta bereziki gaztetxoenek, Uritarrari erakusten dioten babesa eta atxikimendua. “Hunkitu egiten nau”. Era berean, jokalarien meritua nabarmendu du. “Izan ere, aurten ez dute ezta txanpon ere bat kobratu. Horrek adierazten du gauzak beste modu batean atera ahal direla aurrera eta gurera ez dela diru bila etortzen, baizik eta lantzen ditugun balioak direla eta”.