Fiskaltzak orotara 77 urteko espetxe-zigorra eskatu du auzipetuentzat, 2010ean euskal presoen eskubideen alde egindako lana “ETAren manupekoa” zela egotzita. Auzipetuek maiatzean egindako agerraldian adierazi zutenez, “atxiloketak gertatu ziren ezker abertzalea konfrontazio armaturik gabeko agertoki berria eraikitzeko lanean zebilela, eta polizia-operazio hark estrategia-aldaketa zapuztea zuen helburu”. Era berean, azaldu zuten haien ekarpena izan zela “kolektiboko presoei agertoki politiko berrira egokitzeko laguntza ematea, agente aktiboak bihurtu zitezen”. Halaber, esan zuten onartezina dela epaiketa orain egitea, ETAK borroka armatua utzi eta handik 10 urtera, eta gogora ekarri zituzten jasotako tratu txarrak eta torturak. Zuriarrainek hain zuzen bideo baten bidez ezagutzera eman ditu atxilotuta egon zen bost egunean pairatu zituen torturak.
Astelehenean, uztailak 12, eta 13/13 auziaren baitan, Euskal Herriko zortzi herritarren aurkako epaiketa hasiko da Espainiako Auzitegi Nazionalean. Naia Zuriarrain larrabetzuarra dago auzipetuen artean. Bihar, uztailak 10, manifestazioa egingo da Bilbon eta Donostian, epaiketa “garaiz eta lekuz kanpo” dagoela salatzeko. Bilboko manifestazioa 12:00etan aterako da Jesusen Bihotza plazatik.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).