Bizkaiko Topaketa Sozialistak zapatuan egingo dituzte Larrabetzun

Herrialdeko topaketak antolatu ditu Gazte Koordinadora Sozialistak (GKS) datozen asteetarako, eta Bizkaikoak zapatuan, uztailak 24, egingo dira Larrabetzun. Prestakuntza politikorako aukera izango da bertan, besteak beste. Gedar Langile Kazetaren arabera, “gaur egungo testuingurua aztertzeko eta etorkizuneko erronken inguruan hausnartzeko” saioak antolatu ditu GKSk, “gizarte despolitizatuaren aurrean jendarte politizatu bat sortzeko” bidean pausoak egiten jarraitzeko. Horren adibide da, esaterako, “Gazte esparruko erronka estrategikoak” hitzaldia, Larrabetzun entzun ahal izango dena.

Dena den, prestakuntzarako uneez gain, Topaketa Sozialistetan aisialdirako eta sozializaziorako aukerek garrantzi berezia izango dute, Gedar Langile Kazetak azaldu duenez. Izan ere, pandemiak hutsuneak eragin ditu hazte-prozesuan dagoen komunitate politikoa batzeko orduan. Mendi-martxa zein bertso-bazkaria ere izango dira, besteak beste, zapatuan.

Zapatuan, 9:00etan elkartuko dira gazteak herriko plazan, eta mendi-martxa eta hitzaldia izango dira ondoren. Bertso-bazkaria egingo dute gero, eta Bittor Altube, Gorka Pagonabarraga eta Maide Garmendia arituko dira kantari. Ekitaldi politikoaren ostean, J Martina eta Peio eta Itsua taldeen kontzertuek amaiera emango diote egunari.

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).