Larrabetzuarrak aspalditik dabiltza herria 2. tarifa-gunean sartzeko. Sinadurak ere batu dituzte eta horiek Bizkaiko Foru Aldundira bidali dituzte. Era berean, gazteek Garraio Irauli lantaldea sortu dute Lezamako eta Zamudioko beste gazte batzuekin batera, eta Bizkaiko Foru Aldundiari bi aldarrikapen egiten dizkiote: alde batetik, Larrabetzu 2. Tarifa-gunean sartzea; eta bestetik, unibertsitatera autobus gehiago jartzea. Eskaerak Larrabetzuko osoko batzarrera eraman zituzten atzo eta bertan haien aldeko mozioa onartu zuten.
Txorierriko udalerria den arren, Bizkaibuseko zerbitzuari dagokionez, Larrabetzu 3. tarifa-gunean dago, baina Txorierriko gainerako herriak eta Galdakao, berriz, 2. Tarifa-gunean; ondorioz, larrabetzuarrek autobus-txartel garestiagoa ordaintzen dute. EH Bilduk auzia eraman du Bizkaiko Batzar Nagusietara. El Correo egunkarian jaso dutenez, bertan, Garraioetako diputatuak, Miguel Angel Gomez Viarrek, azaldu du tarifa-guneak berrantolatzeko aukera aztertzen dabiltzala eta, horri lotuta, esan zuen Larrabetzuko egoera ere aztertuko dutela 2. tarifa-gunean sartu ahal izateko.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).