Programa iaz jarri zen martxan. Guztira 45 lagun dabiltza goi-mailako gastronomia espezializatzen Azurmendin. Ikasleek goi-mailako sukaldaritzako eta jatetxe-zerbitzuko espezializazioa lortuko dute, zeina maila goreneko jatetxeetara bideratuta baita. Orotara, 1.750 orduko ikastaroa eskaintzen da. Gehienak, 1.450 ordu, praktikak dira, jatetxean. Gazteak Azurmendi jatetxeko langileekin batera aritzen dira egunero, sukaldea, teknikak eta esperientziak partekatuz. Gainerako 300 ordu, aldiz, ikasgelan ematen dira. Aurten 15 ikasle berri sartu dira programan.
Bizkaiko Foru Aldundiak 450.000 euroko dirulaguntza ematen dio programari, ikasleek bekak jaso ahal izateko. “Programa foru-erakundearen estrategian sartzen da, Bizkaia abangoardia gastronomikoaren erreferente bihurtzeko, berrikuntza aplikatuta eta sektorean ezagutza sortuta”, esan du Aldundiak zabaldu duen prentsa-oharrean.