Bestalde, eta gastuei dagokienez, “% 19 langileen gastuei lotuta dago; % 17, Mankomunitateak kudeatzen dituen zerbitzuei; % 6, herriko taldeentzako dirulaguntzei; eta % 29 finkoak dira”. Hortaz, “% 27 gelditzen zaigu inbertsioetarako eta proiektuetarako, eta % 2 maileguak ordaintzeko”.
Udalaren esanetan, udal-kudeaketaren oinarriak dira herritarren parte-hartzea, gardentasuna eta tokiko taldeen inplikazioa. “Herri euskalduna nahi dugu, askea, guztiontzako aukera-berdintasuna sustatzen duena, zeinetan auzokoak eta taldeak protagonista baitira, eta udal-kudeaketan inplikatzen dena; herri solidarioa, ingurumena eta sustraiak babestea lehentasuntzat duena. Gure apustua da gazteak, herri-kultura eta sormena babestea eta memoria historikoa berreskuratzen jarraitzea”.
Udalak azaldu duen moduan, aurrekontuak egiteko orduan kontuan hartu dituzte “une honetan gizarteak dituen arazo nagusietako batzuk, erronkak eta Larrabetzu 2030 agenda”. Euren asmoa da agenda hori 2022an sozializatzea, udalerri osoa inplikatzeko. Agenda horietako ildo batzuk hauek dira: lurrak erostea beste nekazaritza-eredu bat abian jartzeko; beharrizan handiak dituzten familiei laguntzen jarraitzea, hutsik dauden etxebizitzak merkaturatzeko kanpaina, euskara ikasteko laguntzak, herritarren parte-hartzea eta gardentasuna.