Zelan bururatu zitzaizun Arabiara joatea?
Mikel Bilboko laguna eta biok joan ginen. Karreran ezagutu genuen elkar eta normalean urterik behin joaten gara Athletic Bilbotik kanpo zuzenean ikustera. Azkena aurreko Kopako finalerdian, 2020ko martxoan, izan zen: Granadara joan ginen. Partida galdu genuen, baina finalerako txartela lortu genuen. Orduan, pentsatu genuen beste bidaia bat egin behar genuela Athleticen atzean; eta atzerrira joatea zoragarria izango litzatekeela, bioi bidaiatzea gustatzen zaigulako. Pandemiak dena gelditu zuen, baina 2021eko irailean ematen zuen bukatzear zegoela. Eta Arabiara joateko bidaia antolatu genuen.
Irailetik hona, aldaketak egon dira bidaian, ezta?
Bai. Hasiera batean, partidak Yeda hirian jokatu behar ziren, baina Superkopa egin baino 15 egun lehenago, antolatzaileek egoitza aldatzea erabaki zuten eta partidak Riadera eraman zituzten, Yedatik 1.000 kilometrora. Beraz, dena aldatu behar izan genuen: hegaldia, hotela... Baita plangintza ere: esate baterako, urpekaritza egiteko asmoa genuen Itsaso Gorrian, Yedatik gertu, baina azkenean ekimena bertan behera utzi behar izan genuen. Oso estresagarria izan zen dena, herrira sartzea ere erraza ez delako: bisa eskatu behar da, Arabiako erroldan izena behar duzu, PCR negatiboa eman behar duzu....
Azkenean dena ondo atera zen, ezta?
Bai, dena aldatu ahal izan genuen. Gainera, Riaden lagun bat daukat, eta berarekin batera egin dugu bidaia. Nik Londresen ezagutu nuen aspaldian, ingelesa ikasten genbiltzala. Luxua izan da Arabiako mutil batekin Riad ezagutu ahal izatea.
"Londresen ingelesa ikasten nenbilela, Arabiako lagun bat ezagutu nuen eta berak erakutsi zigun Riad"
Etsituta, Athleticek galdu zuelako?
Tira, bai. Ez dut esango gutxienekoa dela, Athleticek irabazi izan balu, horrek amaiera bikaina emango ziokeen bidaiari, baina ondo pasatu dugu: basamortua ezagutu dugu, primeran egon gara, ez dugu COVID-19a harrapatu, bidaia luzea izan arren –Riad-Doha-Madril-Bilbo–, lo eman genuen eta oso gustura egin genuen.
Eta Arabia, zelangoa da?
Arabiako lagunak herriaren berri eman zigun: Saudi Arabiak 90 urte ditu. Familia batzuek herria eratu zuten, petrolioa ateratzen hasi zenean. Oso zorrotza da islam erlijioarekin, eta nahiko itxia. Era berean, guztiok dakigu nolako jarrera adierazten dieten emakumezkoei. Eta zaila da bisa lortzea, hara turistatzat joateko. Hala ere, barruan zaudenean erabat desberdina da, jendea oso hurbila delako. Izugarrizko ongietorria egiten dizute eta beti laguntzeko prest agertzen dira. Guk arazotxoa izan genuen basamortuan eta hango lagunek lagundu ziguten eta tea hartzera gonbidatu gintuzten. Gainera, kulturalki guztiz desberdinak dira: ez dago ez alkoholik, ez txerirrik; janaria lurrean eta eskuz hartzen dute; gamelua jaten dute...
Zer da gehien gustatu zitzaizuna?
Bereziki basamortua gustatu zitzaidan. Txangoa egin genuen hara motorrez ilunabarra bertatik ikusteko, eta zoragarria izan zen. Gainera, jendearen jarrera eskuzabala ere azpimarratu behar dut. Arraroa da, jendea oso hurbila delako eta gobernua, aldiz, oso itxia.
"Arraroa da: Saud Arabiako jendea oso hurbila da eta bertako gobernua, aldiz, oso itxia"