Batutako diruari esker, laguntza emango diete elkarte biri, bakoitzak 500 euro jasoko baititu: batetik, Zaporeak elkartea, Greziako errefuxiatuei jaten ematen diena; eta bestetik, Txokoan, emakumezkoen pilota Larrabetzun bultzatzen duena. Antolatzaileak ez ezik, txakolin-ekoizleak ere agertu ziren poz-pozik. “Esan digute izugarri saldu dutela. Goizean jende pila etorri zen, baina arratsaldean ere hainbat lagun ibili ziren herrian. Eguraldi ona egin zuen eta jendeak aprobetxatu zuen gurera etortzeko. Izugarrizko giroa izan genuen herrian, egun osoan zehar”, esan du Gazteluk.
Betiko moduan, Txorierriko zortzi ekoizleren ardoa dastatzeko aukera egon zen azokan: Gorka Izagirre, Sasine, Sasikoetxe (Larrabetzu), Basalbeiti, Erdikoetxe, Garkalde, Magalarte (Lezama) eta Magalarte (Zamudio). Txakolinaz gainera, bisitariek baserriko eta artisauen produktuak erosi ahal izan zituzten.