“Ekaina iritsi da eta Larrabetzu ez da 2. tarifa-gunera aldatu eta larrabetzuarrok Larrabetzun bizitzeagatik gehiago ordaintzen jarraitu behar dugu. Argi geratu da negoziazioarekin ez dela konponbiderik lortu. Horregatik, herri-arazoek herri-erantzunak behar dituztelako, ekainaren 17an mobilizazioa egingo dugu”, esan dute.
Txorierriko udalerria den arren, Bizkaibuseko zerbitzuari dagokionez, Larrabetzu 3. tarifa-gunean dago, baina Txorierriko gainerako herriak eta Galdakao, berriz, 2. tarifa-gunean; beraz, larrabetzuarrek % 22-26 garestiago ordaintzen dute autobus-txartela. Ugaldek aurreko lerroetan aipatutako bileran azaldutakoaren arabera, Bizkaiko garraio publikoaren tarifikazio osoa aldatzeko asmoa dago eta bost eremu izan beharrean, hiru eremu egongo lirateke; ondorioz, Larrabetzu 2. tarifa-gunera pasatuko litzateke. Aldaketa ekainerako egitekoa zen.