Beste alde batetik, Auzokideak elkarteko kideek erabaki dute egunero osasun-etxera joatea, medikurik dagoen jakiteko. Era berean, aurreratu dute Gabonetan elkarretaratzea egingo dutela jubilatuen elkarteko kideekin batera. Oraindik ez dute zehaztu ez eguna, ez ordua.
Auzokideak taldeak jakinarazi duenez, medikuak oporrak-eta hartzen dituenean ordezkorik gabe jarraitzen dute Larrabetzun. Esandakoaren arabera, medikurik dagoen ala ez enteratzen dira hitzordua hartzen dutenean edo osasun-etxetik hitzordua bertan behera uzteko deitzen dietenean. Aurretik zenbat ekintza egin dute egoera salatzeko eta ordezkoa ipintzeko eskatzeko, eta oraingo honetan erabaki dute egoerari jarraipena egiteko. Horregatik, osasun-etxeko sarreran egutegi bat ipini dute, mediku-zerbitzuko gabeko egunak bertan zehazteko. Gainera, buzoia ere jarri dute herritarren ekarpenak jasotzeko.