Uritarrak taldearen eskolako entrenatzaileek eta jokalariek euskaraz egiten dute. “Ez da propio hautatu duguna, modu naturalean gauzatzen dugun praktikaren ondorioa baizik. Eta praktika bera partidetan ere egiten dugu: aurkariarekin euskaraz aritzen gara eta % 90ek euskaraz erantzuten digute”, esan dute larrabetzuarrek.
Uritarrak taldeko arduradunen hitzetan, epailearen lana “pedagogikoa” da, “bereziki” umeekin, eta horregatik da garrantzitsua haiek haurrei euskaraz egitea. “Arautegia batzuetan arrotza da jokalari gazteentzat, baina epailearen azalpenei esker errazago barneratzen dute. Ikasbidean ezinbestekoak diren azalpen horiek gehien menderatzen dugun hizkuntzan jasotzeak barneratze prozesua azkartuko eta aberastuko du”.