Bestalde, Epaileen Elkargoak Uritarrako kideak animatu ditu taldeko jokalariak izandakoak epaile-lanetan aritzera animatzera. “Egia esan, jokalari batzuek epaile izateko ikasketak egin dituzte, baina ez dute etekin handirik atera: alde batetik, ez da diru askorik irabazten, eta bestetik, publikoarengandik jasotzen den presioa ez da gustagarria. Klubok, zaleek zein gurasoek hausnartu beharko genuke horri buruz”.
Uritarra taldeko eskolako entrenatzaileek eta jokalariek euskaraz egiten dute. “Modu naturalean egiten dugu, baita partidetan ere: aurkariekin euskaraz egiten dugu eta % 90ek euskaraz erantzuten dute”. Euren hitzetan, epaileen lana pedagogikoa da, bereziki umeekin, eta horregatik da inportantea umeei euskaraz egitea. “Batzuetan, arautegia arrotza da jokalari gazteentzat, baina epailearen azalpenei esker errazago barneratzen dute: azalpenak ondoen menderatzen dugun hizkuntzan jasotzeak azkartu eta aberasten du barneratze-prozesua”.