“Gure kadeteak denboraldi itzela egiten dabiltza eta espero dugu domekan denon artean ospatzea aurten egin duten esfortzu ikaragarria. Igo ermitara goizean goizetik, baina etorri guztiak arratsaldean gure gudari gazteak animatzera!”, esan du klubak gizarte-sareetan.
Uritarraren kadete taldeak Lehenengo Mailako Bigarren Multzoan jokatu du aurten, besteak beste, Txorierriko Sondika, Zamudio, Lauro eta Derio taldeekin batera. Guztira, partida bi falta dira liga bukatzeko eta larrabetzuarrak hirugarren postuan dabiltza, 62 puntu eskuratuta. Aurretik, bigarren postuan Derio taldea dago, sei puntura. Eta atzetik, Berango taldeak, laugarrenak, 58 puntu ditu eta Ugeragak, bosgarrenak, 56. Hau da, Uritarrak zamudioztarrak mendean hartzen badituzte, hirugarren postua ziurtatuko dute, baita berdintzen badute ere. Eta ondorioz, Ohorezko mailara igotzeko kanporaketa jokatzeko aukera izango dute.