“Neskek lan paregabea egin dute, eta konpromiso ikaragarria adierazi. Gogor egin dute lan azken hilabete biotan eta emaitza kantxan ikusi dugu. Poz-pozik gaude: batetik, txapelengatik; eta bestetik, horiek GRABNI txapelketa irabazten lagundu digutelako. Bizkaiak aspaldian ez du irabaztea lortu, baina aurten garaipena gurea izan da”, esan digu Erlantz García Bizkaiko hautatzaileak. Ezkerparetan, Bizkaiak guztira 15 txapela lortu ditu; eta Nafarroak, bigarrenak, 14. Gainera, trinketean, Bizkaia txapeldunordea izan da, Nafarroaren atzetik.
Garcíak lurraldearen lau pilotari onenak aukeratu behar izan zituen emakumezkoen gomazko paletaren hiru kategoriatan: senior, 22 urte azpiko eta gazte. Lehenengoan ez ziren finalera heldu, baina gainerako bietan, bai, ordea. Gazte mailan, Uxue Urgoitik (Olarreta) eta Naroa Zulaikak (Olgetan) ustekabez irabazi zioten bikote gipuzkoarrari. Normalean Gipuzkoa “andre eta jabe” ibiltzen da emakumezkoen mailetan, baina aurten Bizkaiak 30 eta 22 irabazi zuen. Beste aldetik, 22 urte azpiko kategorian, Maialen Landajo (Olarreta) eta Olatz Zulaika (Olgetan), Naroaren ahizpa, 30 eta 15 nagusitu ziren erraz, giputzen aurka.