Araudia betetzeko, 83 aparkaleku egin behar dira lurrazpian, baina horretarako leku nahikorik ez dago. Beraz, Udalak uste du konponbide bakarra bizitegietako eremuaren sakonera handitzea dela eta horregatik proposatu du aldaketa “puntuala” HAPOn, azalera doitzeko eta hornitze-estandarrak betetzeko. Aldaketa horrekin batera, beste doikuntza txiki batzuk ere egingo dira: esate baterako, lurzoruaren mugak eta eraikinen ezarpen-kotak eta altuerak aldatuko dira. Gainera, Udalak eraikinetan baimendutako gehieneko hegaldien erregulazioa berregokitzea proposatu du, HAPO bizigarritasun-baldintzen dekretu berrira egokitzeko.
“Aldaketak ez dauka eragin berezirik herrian, lur azpian jarriko diren aparkalekuetan eragina izango duelako, hau da, apur bat handiagoak izango direlako. Etxebizitzak berdin-berdin egingo dira eta ezaugarri berak izango dituzte. Kanpoko berdegunea ere apur bat desberdina izango da. Dena dela, Udalak berak erabaki horiek ezin ditu hartu, argitaratu behar dira eta herritarrek ekarpenak egiteko aukera izan behar dute. Eta hori egin dugu”, esan du Iñigo Gaztelu alkateak.