Bost bikotek hartuko dute parte txapelketan: Arraiza-Mendizabal, Aldai-Oses, Etxegarai-Gaminde, Arrizabalaga-Galeano eta Garai-Capellan. Lehenengo partida, Aldai-Oses bikoteak eta Arraiza-Mendizabal bikoteak jokatuko dute elkarren kontra uztailaren 16an, Barakaldon, 18:30ean. Hurrengo asteotan ligaxka jokatuko da hainbat herritan: Gasteiz, Zarautz, Donostia, Bakio eta Lezo. Finalerdiak irailaren 13an jokatuko dira Galdakaon; eta finala, irailaren 29an, Hondarribian. Azken partida EITB1 kateak eskainiko du zuzenean.
Txapelketa Xaker Larrabetzuko enpresak antolatu du eta aurkezpenean Iker Amarika enpresaren kidea ibili da hizlari. Pilotariek txapelketari buruzko iritziak eman dituzte. “Pilotari gazteak gogor datoz; guk bidea ireki diegu eta gaur egun maila oso altua da. Txapelketa oso orekatua izango da, goi-mailako pilotariak daudelako eta bikoteen maila antzekoa da”, esan du Amaia Aldai iazko txapeldunak. Gainera, pilotakada batzuk eman dituzte Azurmendi jatetxearen atearen kontra. Pilota biguna erabili dute horretarako. Bukatzeko, kopaua eskaini da.
Informazioa:
www.emakumemastercup.eus