Bigarren tartea lotuko da dagoeneko Iurreta eta Amorebietaren artean erabilgarri dagoen 5,5 kilometroko bizipistara. Esan moduan, hirugarren tartea egingo da Erletxeta eta Larrabetzuren artean. “Bizikleta-bideak 13,5 kilometro izango ditu guztira, eta gaitasun handia, hiriguneak, auzoak, merkataritza- eta industria-poligonoak eta ikastetxeak lotzeko. Aukera erosoa eta segurua izango da bizikleta eguneroko joan-etorrietan gehiago erabiltzea sustatzeko”, esan dute Azpiegituretarako eta Lurralde Garapenerako Sailak kaleratutako prentsa-ohar batean.
Ibaizabalgo bizipistaren lehenengo tartea 2023ko martxotik dago erabilgarri. Bizipista bizikleta zein oinezkoentzako ibilbidea da: Zubieta industrialdean hasten da, Amorebieta-Etxanon, eta AP-8 autobidearen paraleloan jarraitzen du. Ibilbide horretan hainbat auzo zeharkatzen ditu (San Miguel Dudea, Erkoles, Euba, Berna eta Arriandi) eta Mallabiena industrialdean amaitzen da, Iurretan. Bizipistaren bi muturrak lotuta daude aurretik zeuden bizikleta eta oinezkoentzako udal bideekin.