Adierazpen horretan, kanpaina honetako kideek aipatu dute Euskal Herria beti izan dela herri solidario bat, “injustizien aurrean geldirik gelditzen ez dena”, eta hala erakutsi zutela Espainiako Bueltan. Bertan, “argi eta ozen” aldarrikatu zuten ez zutela onartuko “kirolaren bidez Israel egiten ari zen aurpegi garbiketa”.
Herritar hauek salatu dute isunak, “beste behin, genozidioaren aurrean ahotsa altxatzen duten herritarrei” jarri zaizkiela, eta ez “genozidioaren konplize diren enpresa eta gobernuei”. Horrez gain, aipatu dute ez direla bakarrak izan, izan ere, Euskal Herriko beste txoko askotan “beste isundu asko” badirela. Hauek eskua luzatu nahi diete kanpainara batzeko eta Palestinarekiko elkartasuna adierazten jarraitzeko.
Bilboko erdigunean bildu dira, EAEko eta Nafarroako gobernuei exijitzeko “Palestinarekin elkartasuna kriminalizatzeari uztea”. Horrez gain, bi gobernu hauei ere exijitu diete “genozidioa gelditzeko euren esku dauden neurri guztiak har ditzatela”, hala nola, “genozidioaren konplize diren enpresa eta erakundeekin harremanak moztea”.
Kanpaina honetan hainbat herritan informazioa banatuko dute, isunei aurre egiteko dirua biltzeko helburuarekin. Hala ere, epaitegian isunei nola aurre egin aztertzen ari dira, Kepa Ugartek BERRIAn dioenez, eta haien kontrako helegiteak aurkeztu dituzte dagoeneko.