“Marka nahikoa daukat 800 eta 1.500 metroko lasterketetan parte hartzeko, baina bakarrik horietako batean egingo dut korrika. Oraindik ez dakit zeinetan: entrenatzaile eta bion artean erabakiko dugu. Bietan parte hartuko banu, oso nekagarria izango litzateke eta ezin izango nuke maila ona erakutsi”. Valladaresek finalerako sailkapena lortzea du helburu, eta hori lortuz gero, iazko arantza kenduko du. “Lehengo urtean, ezin izan nintzen txapelketa horretan aritu, lesionatuta ibili nintzelako”.
Lezamarrak emaitza onak lortu ditu aurten pista estalian: Euskadiko txapelketan, 1.500 metroko lasterketa irabazi zuen; eta Espainiako txapelketan, 10. postuan bukatu zuen 800 metroko lasterketa. Era berean, maiatzaren 22an Euskadiko aire libreko txapelketa jokatu zen eta Mikel bigarrena izan zen 800 metroko finalean. Bihar, beste hitzordu garrantzitsu bat du, Bizkaiko txapelketa izango delako Durangon. Gazteak 400 metro lauetako proban hartuko du parte.