Gaizka duela urte batzuk hasi zen lan egiten taldearekin: eurekin harremanetan jarri eta argazkiak eta bideoren bat egingo zituela adostu zuten. 2019an, lezamarra talde nafarraren atzean ibili da Euskal Herriko areto txiki esanguratsuenetatik: Plateruena, Kafe Antzokia… Ekainean, Victoria Eugenia antzokian egon ziren, Donostian; eta uztailean, lehengo asteburuan, BBK Live jaialdian, Bilbon. “Guztira 20.000 ikusle batu zituen talde euskaldun bakarra izan zen jaialdi horretan. Giro itzela egon zen, adin guztietako zaletuak, hiru orduko saioa, kolaboratzaile asko igo ziren oholtzara… Gogoan izateko kontzertua izan zen, espero genuen moduan”.
Normalean, argazkilariek ez dute euren lana edozeinen eskura jartzen, baina Gaizkaren ustez, argazki horiek material artistikoa baino zerbait gehiago dira. “Jendeak irudiak elkarbanatu nahi zituen, kontzertua betiko gogoan izateko. Eta grina hori hain handia zenez, argazkiak argitaratzea erabaki nuen, nahi duenak –norbanakoak zein komunikabideek– musu-truk erabiltzeko. Berria egunkariak lehenengo orria kaleratu zuen nire argazkietako bat, eta euskarazko wikipediak ere eskatu zizkidan irudiak. Esate baterako, nire lanari esker, El Drogas abeslariaren argazki libre bat dago wikipedian”.
Azken egunotan, Gaizkaren telefonoa sutan ibili da. “Gizarte sareen bidez, zorionak eman dizkidate. Pozgarria da jendeak zure lana aintzat hartzea”. Gainera, bere webguneak 20.000 bisita jaso zituen argazkiak bertan argitaratu ostean.