Aitu udal-aldizkarian jakinarazi dutenez, aurreko urteetan moduan, Lezamako Udalak bat egingo du Ondarearen Europako Jardunaldiekin. Aurtengo gaia da “Guztion ondarea, denok parte”, eta Lezamak umeentzako ibilaldia antolatu du urriaren 10erako. Ekintzaren bidez, herriko ondarea hurbilduko diete lezamar gaztetxoei.
Zortzi urtetik gorako umeentzako bisita izango da eta bertan lotuko dituzte natura-balioak, historikoak eta artistikoak. Horretarako, herriko ibilbide bitaz baliatuko dira: Goitioltza eta Dorrea. “Ziur gaude kontatzen ez diren istorioak ahaztu egiten direla eta erabiltzen ez diren bideak galdu egiten direla. Lezaman oraindik asko dago kontatzeko, aurretik izan genituen lezamarrek egindako bideari esker “, idatzi dute.
