“Udal-zerbitzuak bermatzean” eta “herritarrei emandako hitza betetzean” oinarrituko ditu Lezamak 2022ko aurrekontuak

Lezamako Udalak jakinarazi duenez, 3.130.364 euroko aurrekontuak onartu dituzte 2022rako; EAJko zinegotziek aldeko botoa eman zuten, eta EH Bildukoek, kontrakoa. COVID-19ak eragindako pandemiak aurrekontuak diseinatzea baldintzatu arren, Jon Ander Aurrekoetxea Lezamako alkatearen esanetan, “udalak aurrekontu-proiektu bat planifikatzea lortu du eta horrek jarraituko du funtsezko udal-zerbitzuak eraginkortasunez eta eraginkortasunez emango direla bermatzen, talde ahulenentzat eta kaltetuenentzat banaketa zuzena eta babes berezikoa izan dadin”.

Ildo horretan, eta aurreikuspenen arabera, Udalkutxaren ekarpena % 23,8 handituko da, eta diru-sarrerak, oro har, % 18,37.   

“Aurtengo aurrekontuen beste ardatz nagusietako bat izango da herritarrei emandako hitza betetzea”. Horretarako, lezamarrek 2017, 2018 eta 2019ko partaidetza-aurrekontuetan proposatutako proiektuak egingo ditu udalak. “Emandako hitza bete behar dugu. Gure bizilagunek beren proposamenak helarazi zizkiguten eta, denborak eta ekonomiak uzten duten neurrian, horiek errealitate bihurtu nahi ditugu parte hartzeko prozesu berriak planteatu aurretik”. Esan moduan, gobernu-taldeak 120.000 euro erabiliko ditu pumptrack pista berri bat sortzeko, eta beste 145.000 euro, Euskaldun Berria plazan, udaletxearen atzean, dagoen haur-jolaserako gunea estaltzeko. Bestalde, 40.000 euro inbertituko ditu kiroldegiko futbol 5 zelaiko belar artifiziala ordezkatzeko; 190.000 euro, udaletxeko bulegoak eraberritzeko; 125.000 euro, Kristo Santuko ermitako estalkia eta fatxada birgaitzeko; eta 72.000 euro, Hiri Antolamenduko Plan Orokor berria (HAPO) idazteko .Plan horren kostua 242.000 eurokoa izango da 2025era arte.

Beste aldetik, “eta udalerriko puntu beltzak ezabatzeko politikari jarraituta, udalak 200.000 euroko inbertsioa egingo du udalerriaren nukleoaren zati bat auzokideekin adostuta urbanizatzeko. Udaletxearen atzealdea oinezkoentzat atontzeak hobekuntza handiak ekarriko ditu segurtasunaren arloan, eta, bestalde, Lezamako erdiguneak bizitza sozial handiagoa izango du, batez ere haurrentzat eta haien familientzat”.

Era berean, udalak 15.000 euro bideratu ditu udal-zabortegien bideragarritasunari buruzko azterlan tekniko bat egiteko, “herritarren eskaerei erantzunez eta ingurumenarekiko konpromisoari eutsiz”. Udalak “euskararen aldeko apustu sendoa egiten jarraituko du, kasu honetan Soziolinguistika Klusterra enpresa Txorierrin egiten dabilen diagnostiko baten bidez. Horren kostea 18.150 eurokoa izan da eta, gainera, beste 3.000 euro bideratuko dira emaitzak lortu ondoren aurkezpenak egiteko”. Esandako enpresaren langileak urrian ibili ziren Lezaman datuak batzen, eta espero da emaitzak aurten aurkeztu ahal izatea.

Diru-laguntzei dagokienez, gobernu-taldeak udalerriko elkarte-sarea sustatzen jarraituko du, eta guztira 100.300 euro bideratuko ditu herriko elkarteei laguntzera; izan ere, “Lezamako egunerokotasunean funtsezko eginkizuna dute, gure herriari bizia emanez”. Gainera, 62.000 euro bideratuko ditu hainbat kontutara, hala nola beharrizanak dituzten familiei laguntzera, kultura-lehiaketak antolatzera, Txorierriko beste udalerri batzuetako kiroldegietan abonatuta daudenentzako laguntzetara eta herriko merkataritza-, ostalaritza- eta zerbitzu-establezimenduetan kontsumoa sustatzera.

Ekarpenak Mankomunitateari

Azkenik, “urtero bezala, Lezamako Udalak diru-ekarpena egingo dio Txorierriko Mankomunitateari, hainbat zerbitzu mantendu ahal izateko eta, bestalde, izaera sozialeko proiektuak gauzatzen jarraitzeko. Aurten, ekarpena 749.630 eurokoa izango da, eta ohiko zerbitzuei eusteko erabiliko dira, esaterako, hiri hondakin solidoak biltzea, argiteria, euskaltegia eta berdintasuna. Bestalde, Lezamako Udalak eta Txorierriko Mankomunitateak jarraituko dute euskararen, esku-hartze komunitarioaren, etxez etxeko laguntza-zerbitzuaren eta gizarte- eta hezkuntza-arloko esku-hartzearen alde lan egiten, beste askoren artean”.

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).