Datozen hilabeteotan, 15 pilota jaialdi egingo dira Lezaman barikuetan. Aurten, partidak ordu erdi lehenago hasiko dira, 19:00etan; bestela, “berandu egiten da”, Jaime Uriarte klubaren presidentearen esanetan. Betiko moduan, bikoteak bi mailatan daude banatuta: gazteak eta seniorrak. Txapelketari hasiera emateko, txorierritar bat ikusteko aukera izango dugu gazte mailan, Adrian Uriarte. Horrek Bernaolarekin (Munitibar) osatuko du bikotea eta Beitia (Zeanuri)-Bullon (Zornotza) taldearen kontra jokatuko dute. Senior mailan, Egiguren-Elosegi azpeitiarrak Erkiaga (Zeanuri)-Erasun (Zizurkil) bikotearen kontra arituko dira.
“Uste dugu txapelketa polita ikusiko dugula, pilotarien maila handia baita. Esate baterako, Ekhi Irribarria eta Beñat Zubizarreta (Iker Irribarria eta Iraitz Zubizarreta profesionalen anaiak, hurrenez hurren), gure Oier Hormaetxe… Batzuk gazteak dira, eta beste batzuk, txakur zaharrak. Ikusgarria izango da. Bestetik, Txorierriko pilotariek emaitza ona lortu ahal dute, Ikusiko dugu”, esan du Uriartek. Finalaren data zehazteke dago, baina antolatzaileek otsailaren azken astean egitea espero dute.