Azokan 50 saltoki inguru ipiniko dira eta, besteak beste, gazta, ogia, sendabelarrak eta hestebeteak salduko dira. Horrezaz gainera, artisauen lana jarriko da ikusgai eta eskuragai: larrua, zilarra eta zeramika, esate baterako. Era berean, titiriteroek eta juglareek kalea girotuko dute, eta antzerkia eta su-ikuskizunak eskainiko dira. Berbenak egongo dira, eta ipuin-kontalari batek umeak gozaraziko ditu. Azoka Zabaloetxe eta Abadetxe kaleetan atonduko da.
Loiuko Udalak Erdi Aroko arropa janzteko deia egin die herritarrei, eta hiru sari banatuko ditu mozorrotzen direnen artean: 300 euro, kide gehien duen kuadrillarentzat; 100 euro, soinean jantzirik onena darabilen neskarentzat; eta 100 euro, soinean jantzirik onena darabilen mutilarentzat. Epaileak herriko ostalariak izango dira. Azkenik, aipatu beharra dago aparkaleku bi atonduko direla, bisitariek autoa bertan utzi ahal izateko.