Begoñak idatzitako postean jaso ditu Ainhoa Tubet kultura zinegotziaren hitzak. Horren arabera, Tubetek azaldu du gaur egungo egoera dela-eta ez dagoela berme nahikorik ekintzak segurtasunez ospatu ahal izateko. “Gastronomiari, kirolari, kulturari, musikari… lotutako 60 ekitaldi baino gehiago izaten ditugu jaietan eta jendetza batu ohi da ekitaldietan. Hortaz, arduraz jokatzen jarraitu behar dugu, eta osasun-irizpideak errespetatu”. Tubeten esanetan, “loiuztarrek ez ditugu ulertzen paellarik, herri-bazkaririk edota kontzerturik gabeko jaiak eta momentu honetan ezinezkoa da ekintza horiek egitea”. Horri lotuta, baztertu du hiruzpalau ekintzak osatutako jai-egitaraua egitea. “Gure ustez, ez lirateke jaiak izango eta, gainera, ezin dira herriko jaiak iragarri, baina gero ekitaldi nagusirik ez egon”.
Loiuko alkateak webgunean jakinarazi duen moduan, “jaietara bideratu ohi den diru-partida erabiliko da herritarrei laguntzeko”.