Zehatz-mehatz, zirkuito hau prestatu dute: 12:00etan, My Bastard Friend, Toki Onan (Larrondo); 14:00etan, Tequilas, Nagusien Etxean (Zabaloetxe); 16:00etan, Lehian, Batzokian (Zabaloetxe); 18:00etan, Lowe, Sagardotegian (Zabaloetxe); eta 20:00etan, Luhartz, Gozko Etxean (Lauroeta).
Udalak jakinarazi duenez, doako autobus-zerbitzua egongo da, entzuleak leku batetik bestera eramateko. Autobusa 11:30etik aurrera izango da martxan (Larrondo-Zabaloetxe-Lauroeta) eta hurrengo bereizgarri hau edukiko du: LOIU FEST.
Josu Andoni Begoña Loiuko alkateak bere webgunean idatzi duen moduan, ekimenaren helburua da “udalerria girotzea eta ostalariei laguntzea, pandemiaren eraginez txarto pasatu baitute azken bi urteetan”. Gainera, azpimarratu du Aste Santua tartean herritar asko kanpora aterako direla eta Loiun mugimendu gutxi egongo dela. “Herria bizirik eta establezimenduak irekita eduki nahi baditugu, uneoro babestu eta zaindu behar ditugu. Eta oporretan, bizilagun asko joaten direnean, egun zailak izaten dira”.