Udalak baldintza bi jarri dizkie interesatuei: bata, 65 urte baino gehiago izatea; bestea, Loiun erroldatua izatea. Bidaia hegazkinez egingo da eta loiuztarrek Benidormen Prince Park hotelean egingo dute lo mantenu osoan. Udalaren esanetan, hotelak kokapena ederra du, herrigunetik 500 metrora. Herritar bakoitzak 145 euro ordaindu behar izango ditu; berarekin batera Loiuko senideren bat joaten bada eta hori 65 urte baino gazteagoa bada, aldiz, 290 euro.
Josu Andoni Begoña Loiuko alkateak bere blogean esan duen bezala, Udalak nagusien alde egiten du lan. “Iaz, Nagusien Etxea berritu genuen; era berean, Larrondon, jubilatuen gela ere atondu dugu. Eta dena biribiltzeko, bidaia antolatu dugu Benidormera. Azken bidaia 2019an egin genuen”.