“Denbora luzea eman dut horren inguruan pentsatzen. Hogei urte daramatzat Athleticen emakumezkoen taldean: hasieran, jokalari; geroago, entrenatzaile beheko mailetan; eta azkenik, lehenengo taldean... Unea da pausotxo bat aldera egiteko. Erabakia klubari jakinarazi nionean, Lezaman jarraitzea eskatu zidaten, Baskonia taldean, hain zuzen”, adierazi dio Iturregik klubaren kanalari. Iturregik ilusio handia adierazi du eta, bere eskarmentuaz baliatuta, ekarpen polita egitea espero du.
Iturregik hiru urte eman ditu Athleticen emakumezkoen taldeko entrenatzaile. Loiuztarrak emaitza onak lortu zituen bigarren taldean, eta Ángel Villacampa ordezkatu zuen lehenengo taldearen eserlekuan. Bere zuzendaritzapean, emakumezkoen taldeak ez du ibilbide bikainik egin. Iaz, zazpigarren postuan gelditu ziren, lortutako sailkapenik onena; eta aurten, hamargarren postuan. Hala ere, Iturregiren eskutik taldea erabat berritu da: jokalari nagusi batzuek taldea utzi dute eta entrenatzaileak gazteei eman die lehenengo mailan jokatzeko aukera. “Itxaropentsu nabil emakumezkoen taldearekin: aurten jokalari gazte askok jokatu dute eta nik uste dut horiek prest daudela zaletuei poz handia ekartzeko”.