“Reziklart 2009 Sondika†lehiaketa antolatu du bertako Udalak. Lehiaketak elementu birziklagarriez egindako tresnak edo lan artistikoak saritzea du helburu.
Lehiaketan edonork har dezake parte, eta hiru kategoria osatuko dira: 1. kategoria, hiru urtetik zazpi urtera bitartekoentzat; 2. kategoria, zortzi urtetik 12 urtera bitartekoentzat; eta 3. kategoria, 13 urtetik gorakoentzat.
Lanak ekainaren 3ra arte aurkez daitezke Sondikako Kultura Etxeko erabilera askotarako aretoan, astelehenetik ostiralera eta 18:00etatik 20:00etara. Lanarekin batera gutun-azal bat aurkeztu beharko da, itxita, eta bertan datu hauek zehaztu beharko dira: egilearen izen-abizenak, telefonoa, jaiotze-data eta lanaren izenburua.
Orotara hiru sari emango dira: prismatikoak eta 30 euroko kirol-materialerako bonua, 1. kategoriako irabazlearentzat; teleskopio bat eta 50 euroko kirol-materialerako bonua, 2. kategoriakoarentzat; eta erlojua eta 100 euroko kirol-materialerako bonua, 3. kategoriakoarentzat. Originaltasuna, lan edo artikuluaren erabilgarritasuna eta erabilitako elementu birziklagarrien ugaritasuna hartuko dira kontuan, sariak emateko orduan.
Sari-banaketa ekainaren 5ean egingo dute arratsaldeko 6etan, Goiri Erdikoa plazan. Lanik esanguratsu eta originalenak ikusgai jarriko dituzte.