Amets tabernak Sondikako I. Pintxo Lehiaketa irabazi du

Haragizko kategoria Txamo tabernak irabazi zuen; eta arrainezko eta pisu libreko kategoriak, Amets tabernak. Gainera, Amets taberna txapelketaren irabazlea ere izan da. Irabazlea aukeratzeko, kategoria bakoitzean lortutako puntuak zenbatu dira eta puntu gehien lortu duenak txapela eraman du. Bestalde, kategoria bakoitzeko irabazleak garaikur pertsonalizatu bat jaso du saritzat. Epaimahaia osatu dute, alde batetik, gastronomian aditu talde batek; eta bestetik, herritarrek eurek. Adituen erabakia balorazioen % 50 izan da; eta bezeroena, beste % 50a. Euren botoa eman duten herritarren artean 100 euroko txartelak zozketatu dira, ekintzari atxikitako dendetan gastatzeko. Sondika Pintxotan Lehiaketak zapore ona utzi die ostalariei, herritarrei zein antolatzaileei. Lehiaketa hiru barikutan egin da aurten, baina datorren urteari begira, hura zapatura eramateko asmoa dute, herriko tabernetan giro handiagoa egon dadin.