Orotara, 5,28 milio euroko aurrekontua onartu da aurtengo ekitaldirako.
Besteak beste, argiztapenari eta bide-segurtasunari lotutako hobekuntzak egingo dituzte herrigunetik urrunago dauden auzoetan. Izartza kalea, eliza ondoan, urbanizatuko da, eta norabide bakarreko bihurtuko dira Gori kalea (Txorierri eta Mitxine arteko tartea) eta Uribe bidea. Era berean, Goiri-erdikoa kaleko argiztapena hobetuko da, eta oinezko pasabide goratu bat ipiniko da Gorondabeko kalean. Lehendakari Agirre kalean, lurpeko bidearen ondoan dagoen oinezkoen pasabidea atonduko da, irisgarritasuna hobetzeko. Hobekuntzak kiroldegietan ere izango dira, eta ezintasuna duten lagunei zuzendutako aparkaleku-plazak atonduko dira tren-geltokian, Txikigunean eta Udaletxean.
Bestetik, oinarrizko zerbitzuak, hala nola kultura, hondakinen bilketa eta lorezaintza, mantenduko dira, eta 8.000 euro zuzenduko dira gizarte-larrialdietara. Berdintasun Plana garatuko da, eta Egaz Txorierriri diru-partida bat emango diote, herrian lana sustatzeko. Horren haritik, adierazi dute Sondikako langabezia tasa % 8,3koa dela.