Aurtengoa Laburbira euskarazko film laburren hamabosgarren edizioa da. Bihar Begaran hasi eta martxoaren 27an amaituko da Arrasaten. Guztira 29 herri bisitatuko ditu, tartean London, Paris eta Valencia. Ekintzak helburu bi ditu: alde batetik, euskarazko sortzaileen kalitatezko lana ezagutaraztea, ekoizten jarraitu dezaten aukera emanez; eta bestetik, ikusleei hemen eta euskaraz sortutako filmez gozaraztea. Laburbira martxan ipintzeko, Topagunea herriz herriko euskara elkarteekin ibiltzen da elkarlanean, eta Eusko Jaurlaritzaren kultura saileko zein Arabako, Bizkaiko eta Gipuzkoako Foru Aldundien babesa izaten du.
Filmek 15 minutu inguru irauten dute eta erabat ezberdinak dira bai estilo aldetik, bai mezu aldetik: umorea, intriga, kritika, gure historiari begirada, eta kulturaren eta hizkuntzaren transmisioa, besteak beste.