Eskolako teilatua konponduko dute Sondikan

Sondikako Udalak jakinarazi duen moduan, Eusko Jaurlaritzak Gorondagane ikastetxeko teilatua konponduko du. Eraikinak itoginak ditu eta hezetasuna dago haren barruan. Gurasoak horren kexu azaldu dira behin baino gehiagotan. 

“Nahi baino denbora luzeago eman dugu arazo honekin, baliabide ekonomikoak beti mugatuak dira eta”, esan du Xabier Zubiaur Sondikako alkateak.

Lanak urrian lizitatu ziren eta 2019ko udan egingo dituzte, eskola-jarduerari oztoporik ez ekartzeko. Lanetan 329.507 euro ipiniko dira, eta lau hilabete iraungo dutela aurreikusi dute. 

Bestetik, Udalak herriko luminaria guztiak aldatzeko asmoa du, eta abenduan LED argiak ipintzen dabiltza auzo hauetan: Artxanda, Berreteaga, Izartza, Zangroiz, Aresti eta La Campa. Horrela, Auzoen zinegotzia zerbitzuaren bidez egin den eskaerari emango diote erantzuna. “Auzoetako argiak hobetzen baditugu, segurtasun handiagoa edukitzeaz gainera energia aurreztuko dugu”, esan du Zubiaurrek. Lanetan 19.158 euro inbertituko dute.