Azaldu dutenez, legealdi honetan lehentasunezko 13 proiektu egon dira, eta horietako sei erabat garatu dituzte: auzoko zinegotzia sortzea, gizarte-zerbitzuen zerrenda berria sortzea Mankomunitatearekin eta Bizkaiko Foru Aldundiarekin batera, langabezia-tasa % 10etik behera egoteko helburua ezartzea, Berdintasunerako III. Plana, San Juan auzoko irisgarritasun-proiektua eta Ola-Sondika trenbide linearen garapenari jarraipena egitea.
Legealdiko beste lehentasunezko proiektuei dagokienez, garapen-portzentajeak eman dituzte ezagutzera: Euskararen Plan Estrategikoa 2020 (% 85), birziklatzea sustatzea ( % 70), Asua ibaia bideratzea (% 85), elizaren ondoko lursaila urbanizatzea (% 85), argiteria publikoa eta eraginkortasun energetikoa aztertzea (% 75), haurren parke bat estaltzea (% 25) eta hiri-antolamenduko plan orokorra onartzea eta garatzea (% 75).
Bestetik, “Sondikako Aukera” Lehentasunen Planaren barruan 82 proiektu daude, eta batez besteko betetze-maila % 83koa da.