Garrasia Sondikako talde feministak adierazpena egin du erasoak salatzeko. “Nazkatuta gaude, kokotaraino gaude, eta hemen izango gaituzue horrelako egoeren aurka borrokatzeko prest. Argi utzi nahi dugu ez ditugula horrelako egoerak jasango ez gure herrian ez inon. Horregatik, indarrak batu behar ditugu egoera hau salatzeko eta guztion artean garrai egiteko. Gaur egun, hainbat emakume daude beren erasotzailearekin etxean, inolako babesik gabe. Emakume guzti horiei ere gure eskua luzatzen diegu. Ez zaudete bakarrik, zure alboan izango gaituzue”, esan dute. Erasoen kontra agertzeko, Sondikako taldeak kazerolada egiteko deia zabaldu du gaur, 20:15etik aurrera. Gainera, puntu morea etxeko balkoietan eta leihoetan jartzeko gonbitea ere egin du.
Sondikako Udalak ere gaitzetsi ditu erasoak. “Giza eskubide guztien urraketa larri eta onartezina da. Udal honek biktimei, haien senideei eta hurbileko inguruneari babes zintzoa eskaini nahi die. Ildo horretan, emakumeak errespetatzen ez dituen edozein jokabide arbuiatzen du”. Udalak esan du guztiok jarrera aktiboa izan behar dugula emakumeen aurkako edozein indarkeria-adierazpenen aurrean. “Azken batean, eraso matxisten aurrean erantzukizun indibidual eta kolektiboa hartu behar da”.