Alde batetik, 8.000 euro bideratuko dituzte langabeen prestakuntza-ikastaroetara. Langabeak berak aukeratu ahalko du ikastaroa eta gehienez 400 euro jasoko ditu; dirulaguntza izena ematea edo beste gastu batzuk ordaintzeko –esaterako, joan-etorriak– erabili ahalko da. Beste aldetik, udalak 20.000 euro zuzenduko ditu herriko langabetuen kontrataziora. Laguntza Sondikako zein Bizkaiko edozein herritako enpresek eskuratu ahalko dute eta gehienez 2.000 euro jasoko dute kontratatutako sondikoztar bakoitzeko. Lan-kontratuak gutxienez hiru hilabetekoa izan beharko du.
Eskualdeko planez eta autonomoentzako, ostalaritzarako eta merkataritzarako laguntzez gainera, Sondikako Udalak uste du herritarrei lagundu behar dietela euren burua prestatzen edo lana topatzen. “Talentua dugu eta herriko langabetuak ikusgai egin nahi ditugu, eta haien lehiakortasuna bultzatu”, esan du Xabier Zubiaur alkateak. “Gaur egungo egoera kontuan izanda, trebakuntza sustatu nahi dugu, eta enpresek sondikoztarrak kontratatzea pizgarritzat hartu dezaten”.