Sondikako Udalak jakinarazi duenez, Hiri Antolamenduko Plan Orokorra (HAPO) behin betiko onartu dute. “Oso plan bermatzailea da, Sondikaren herri-izaerari eusten dio eta bere oinarria da erabiltzen ez diren edo hirigintza-garapenik ez duten orubeak berreskuratzea”, azaldu du Xabier Zubiaur alkateak. “Era berean, etxebizitza babestua (babes ofizialekoa eta tasatua) eraikitzeko aukera ematen du, gutxienez eraikitzen denaren % 50, betiere hiri-lurzoruan, ingurune naturala zainduz”.
Ingurumenari dagokionez, planak “Asua ibaiaren ibar osoa babesten du, eta hirigintza-jarduketa bakoitzean ingurumen-irizpideak kontuan hartzea eskatzen du, esaterako, % 15 berdegune eta gune libreetarako gordetzea. Halaber, energia aurrezteko jarraibideak ezartzen ditu, eta baimena ematen du energia berriztagarriak biltzeko sistemak ipintzeko”. Gainera, esandakoaren arabera, planak aurreikusten du lokalak udal-erabilerarako uztea, bertan ikastaroak egiteko eta herriko elkarteek ere erabiltzeko. “Hazteko aukera, azken batean, garenetik abiatuta eta pertsonen ongizatea erdigunean ipinita”.
Aipatu moduan, planaren garapenean parte hartu dute talde erredaktoreak, herritarrek, alderdi politikoek eta udalbatzak.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
