Taldekideek egitarau oparoa prestatu dute egun osorako, San Joan zelaian, udaletxearen atzean. 10:45ean, Ipar Elai txistu taldeak kalejira egingo du herritik; eta 11:00etan, batetik, Hegalariak klubeko taldeek areto-futbolean jokatuko dute eskolan; eta bestetik, puzgarriak jarriko dira. Bazkaldu baino lehen, 13:30ak aldera, pintxo-potea izango da txosnan eta gero, herri-bazkarian, paella zerbitzatuko da. Han bazkaltzeko, bederatzi euroko sarrerak salgai jarri dira Gorondabeko eta Artabe kiroldegietan, Txamo tabernan eta Sondikako Batzokian.
Era berean, arrastian, bingoa egingo da, eta ondoren, hiru musika-saio: lehenengoan, 19:00etan, Ekhi Cover Pop taldeak 80ko hamarkadaren musika joko du; bigarrenean, 22:30etik aurrera, Nafi Diaz eta Keniama taldearen kontzertuak izango dira; azkenik, 01:30ean, DJ Munzaren txanda izango da.