Sondikako Udalak jakinarazi duenez, erreklamazio-prozedura luze baten ondoren hasi dira San Joan elizaren ondoko plaza konpontzeko lanak. Obra guztiz ordainduko dute arkitektoak eta obra-zuzendaritzak eraikuntza-enpresarekin batera; guztira 90.416 euro (BEZik gabe). “Bagenekien prozesu luzea izango zela, baina zuzena zela. Lehenik eta behin, akordioak lortzen saiatu ginen, baina azkenean bide administratibotik erreklamatu genuen plaza konpontzea eta pozik gaude jada martxan dagoelako”, esan du Xabier Zubiaur Sondikako alkateak.
Plaza urbanizatzeko lanak denbora luzean izan dira geldirik. “Dena dela prozesua ez da amaituko obra ondo amaitu arte”. Beste alde batetik, Goiri Erdikoa plazak atontzeko lanak ere hasi dira. Herritarrek partaidetza bidezko prozesu baten bidez erabaki zuten moduan, bertan ipiniko dira haurrentzako jolas-gune berria eta estalkia ipiniko dira. Lanetan 572.327 euro ipiniko dituzte. Lanek lau hilabete iraungo dute.
Azkenik, liburutegian ere dabiltza konpontze-lanak egiten eta horregatik zerbitzuak udal-txokora eraman dituzte: ikasteko gelak eta liburuen mailegua. Konpontze-lanek hilabete bi iraungo dute eta udalak 221.460 euro ipiniko ditu.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
