Mankomunitateak azaldu duen moduan, zaborra jasotzeko zerbitzua kanpoko enpresa baten bidez ematen da. “Kexa bat jaso dugun bakoitzean, berehala ipini gara enpresa horrekin harremanetan, arazoa konpondu dezan. Enpresak berak aitortu du kamioi zaharrak direla eta, ondorioz, zuloak eta matxurak dituztela, baina horiek antzeman bezain laster konpontzen dituzte”. Era berean, esan dute zabor-kamioiek matxuren ondorioz bide publikora botatzen dutena ez dela “lixibiatu-jarioa, ur-jarioa baizik”. Beste aldetik, jakinarazi dute zerbitzua lizitazio-prozesuan dagoela gaur egun; hortaz espero dute “urte amaierako, edo beranduenez datorren urtearen hasierarako, zabor-kamioi berriak izatea”.
Sondikoztar bat kexu agertu da “zaborra jasotzeko erabiltzen diren kamioiak egoera onean ez daudelako”. Bere esanetan, “kamioiek jarioa dute eta arrastoa uzten dute errepidean; eta putzua, geldirik daudenean. Ondorioz, kiratsa sortzen da, batez ere aspaldi honetan bezala beroa egiten duenean, eta leku batzuetan zomorroak ere agertzen dira”. Azaldu duenez, aspaldiko arazoa da. “Bi urte-edo daramatzagu kexatzen, baina ez da arazoa konpontzen”. Txorierriko Zerbitzuen Mankomunitateak, bestalde, espero du laster zabor-kamioiak berritzea.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).